أثارت صورة لإعلان بيع سيارة مستعملة في جريدة الأهرام المصرية الجدل، لتتحول مواقع التواصل الاجتماعي لسجال بين المتابعين لمحاولة تفسير الإعلان الغامض، والذي ذهب البعض إلى أنه قد يكون حاملًا لرسالة مشفرة.
وننقل لكم فيما يلي تفسيرات المتابعين لهذا لإعلان ، علمًا أن موقع «نيويورك نيوز» لا يتبنى أي تفسير، ونعرض ما تناقله المتابعون في مصر فقط:
قال أحد الحسابات على موقع فيسبوك في محاولة لتفسير الإعلان ما يلي : «الصورة عبارة عن اعلان في الصفحة الاولى لجريدة الاهرام المصرية بتاريخ ١ ابريل ٢٠٢٣م، وزي محنا عارفين فا اعلانات الاهرام غالية جدا، لكن غرابة الاعلان ده انه عن عربية مستعملة تتباع ب٣٠٠ الف بكتيره، عالصفحة الاولى من جريدة الاهرام، من غير اي وسيلة تواصل او رقم تليفون، وصياغة الاعلان نفسه غريبة حبتين، تحس انها رسالة مشفرة مش اعلان خالص.
وأضاف: «فا احنا قدام ٣ خيارات .. – الاول انه اعلان فعلا واحنا خيالنا واسع. – التاني انه تجربة اعلانية استقصائية لقياس المبيعات مثلا. – التالت بقا انه رسالة مشفرة لغرض ما. واحنا مفيش اوسع من خيالنا، فا تعالو نتخيل ونفسر الرسالة سوا واللي عنده تفسير يسيبه في الكومنتات : – جيب رانجلر امريكي ميلتري ستايل: إشارة للجيش الامريكي
– بمواصفات خليجية: بدعم خليجي
– موديل التسعينات معدلة: حرب الخليج
– هنا بيقولك (CC) ٤.١ محرك رئيسي لستة سلندر: الCC معروف مين، محرك رئيسي لستة ايه بقا احداث؟ ملفات؟ الله اعلم.
– تم تعديل مركز الثقل لمنع الانقلاب: واضح انه كان هيبقا فيه انقلاب واتمنع.
– فرملة M.B.S : واللي منع الانقلاب محمد بن سلمان M B.S
– تعليق Hitman – suspention : كان هيتم اغتياله؟
– الاستبن الاحتياطي لم ولن يلمس الارض: اغرب رسالة دي عشان فيها حرف نصب “لن” يفيد النفي في المستقبل، معنى كدة ان البديل في الانقلاب تم استبعاده مثلا؟
– جهاز تعقب وتتبع مسار الحركة: معناه انه متراقب؟
– رالي الصحراء – رالي الفراعنة: تأكيد على مصر والسعودية.
– اكسسوارات وتجهيزات اختيارية: اظن هنا الرسالة معناها ان الدعم والفلوس بإختياره في حالة لو رضخ او وافق على حاجة.
– تأمين شامل لكافة الحوادث المرورية: اعلان حماية.
– (وحوادث القضاء والقدر) نوفمبر ٢٠٢٤: دي صيغة تهديد صريحة، بيقوله خاف على نفسك من نوفمبر ٢٠٢٤، هيحصل ايه في نوفمبر ٢٠٢٤؟ الانتخابات اظن؟؟
– انذار صوت عالي: تهديد بثورة؟ بتدخل دولي؟ – للتواصل وتجربة القيادة الوعرة وحاطت ايميل اسمه “random reactions” ،و “universe24” واخيرا VIP.تجربة القيادة الوعرة تحتمل معنى الانفراد بالحكم او الشطحان او الخروج عن الاوامر، والايميل اسمه “ردود فعل عشوائية”» .
وأكمل صاحب المنشور تفسيره : «اما الكلمة التانية بقا universe25 فهي عنوان تجربة اجتماعية عملها عالم السلوك جون بي كالهون في الستينات عن الاكتظاظ السكاني وعلاقته بالانهيار المجتمعي، تجربة اتعملت على الفئران انهم عاشوا في زحمة كبيرة والنتيجة ان الفئران ظهرت عليها اعراض الضغط النفسي والعزلة والعدائية، وبعدين ظهرت الانحرافات الجنسية، الفشل الأبوي، والعنف المتزايد، لحد الفوضى العارمة».
ونشر حساب آخر هذا التفسير في 11 نقطة كما يلي : « 1- الصفحة الاولي في الاهرام زي ماكلنا عارفين من واحنا صغيرين (( أهم صفحه ف أهم جريده في مصر )) .. بينزل فيها دائما اعلانات حكومية او مناقصات شركات كبري او مزادات اراضي غالية او فنادق .. لكن واحد بيبيع عربية عادية سعرها ميزيدش عن ربع مليون حاجة مش منطقية .. مع العلم تكلفة مكان و حجم الإعلان متقلش عن ٥٠ ألف جنيه.
2- مواصفات العربية نفسها غريبة جدا .. (( كأن فيه كود او شفرة جوه الاعلان )) وصف (( الاستبن )) إنه ( لم ولن يستخدم ) .. ووصف العربيه إنها (( عسكريه بمواصفات خليجيه )) .. ومكتوب عليها 911 اللي معناها يا إما (( رقم النجده الأمريكية )) أو أحداث ٩/١١ بتاعة برج التجاره العالمي.
3- هل صاحب الاعلان مش لاقي كلام يقوله علشان يملي الاعلان .. فاضطر يكتب ٣ سطور في وصف الراديو والmp3 بتاع العربية ؟؟ هل في حد عاقل بيكتب كده ؟
4- وسيلة التواصل ايميل لا فيه تليفون ولا واتساب.
5- إسم الدومين (( universe25 )) اللي هو دومين الايميل اللي في الاعلان ده اسم تجربة مرعبة في قياس السلوك الاجتماعي عملها عالم امريكي مشهور مجنون اسمه ( جون كالهون ) في الخمسينات على الفئران .. عن تأثير الزحام علي السلوكيات العدائية وقت الخطر.
6- الايميل نفسه غريب جدا .. إسمه Random reactions@universe2p .. ترجمته حرفياً هي ( ردود الفعل العشوائية على تجربة الكون ٢٥ )) إشمعنى الإسم الغريب ده ؟؟
7- الايميل شغال والدومين universe25.vip مسجل حديثا يوم ٢٦/٣ يعني معمول مخصوص علشان الاعلان و ده طبعا مش تصرف طبيعي بتاع واحد عاوز يبيع عربية و خلاص.
8- ان حد يشتري domain مخصوص و يحط عليه email و كمان يعمل بيه اعلان غريب الاطوار .. و مش بس كدة .. ده كمان اخفي ملكية ال domain .. يعني مش عاوز حد يعرف ده بتاع مين اساسا .. حد فاهم مش اي كلام.
9- لو أي حد بعت علي الايميل مش هيلاقي feedback .. يعني كمان فيه email server .. و ده معناه انه مستني حاجة معينه بعينها تجيله علي الايميل المكتوب في الاعلان.
10- التأمين عالعربيه لحد نوفمبر 2024 .. وانتخابات الرئاسة الأمريكيه بين بايدن و ترامب اللي المتوقع تتحول لحرب برضو في نوفمبر 2024.
11 – إيه المقصود ب( تم تعديل مركز الثقل لتفادي الإنقلاب ) ؟ .. و ازاي صاحب العربيه ميعرفش ان رالي الفراعنه اللي هو كاتبه بنفسه ملغي من سنة 2015 ؟»
الأهرام ترد
ومن جانبه رد رئيس تحرير الأهرام علاء ثابت على الجدل المثار بشأن الإعلان في بيان جاء نصه : «تابعت باندهاش يغلفه بعض الاستغراب وكثير من التفهم تلك الحالة التى أثارها الإعلان المنشور فى الصفحة الأولى من الأهرام بتاريخ 1 أبريل عن سيارة “جيب رانجلر”، وبالطبع لم يخلُ الأمر من دهشة من ذلك الخيال الواسع فى التعليقات. ومن هنا رأيت أن بعضًا من التوضيح قد يكون مفيدًا.
أولاً: إن أحدًا ممن تناولوا الإعلان بالتعليق لم يتوقف عند حقيقة أن السيارة مملوكة لمواطن مصرى وأن الأهرام أبدًا لم ولن تتورط فى نشر إعلان “مجهول النسب”، فالبيانات الشخصية لصاحب الإعلان ورخصتا السيارة والقيادة التى تؤكد ملكيته لها موجودة لدى الأهرام. ومن هنا تنتفى مسألة الشفرات. فمن يرسل رسالة مشفرة يتعامل بشكل آخر ليس من بينه الإعلان عن هويته.
ثانيًا: إن الأهرام ــ كما أى صحيفة ــ لا تتدخل فى حرية المعلن فى كتابة ما يريد طالما لم تخرج عن القواعد التى تحددها الأهرام ومن قبلها القانون المتعلق بنشر الإعلانات.
ثالثًا: إن الإعلانات أيًا كانت تخضع للتدقيق من جانب إدارة الشئون القانونية بالأهرام للوقوف على مدى قانونية نشرها من عدمه. ولدى الأهرام عبر سنين طويلة الخبرة الكافية للحكم على صلاحية الإعلانات للنشر. وقائمة الإعلانات التى رفضت نشرها الأهرام لأسباب قانونية بصرف النظر عن مقابلها المادى أجزم أن خيال التعليقات غير قادر عن تصورها!
رابعًا: إن التعليقات ــ وإن كان قد شارك فيها بعض الصحفيين جريًا على ما وضعه صاحب الخيال الواسع ــ لم تسأل ولم تشر من قريب أو بعيد للمحدد الأهم فى نشر أى إعلان بأى صحيفة فى مصر أو العالم وهو القانون وهنا بيت القصيد. وبيت القصيد هو ماذا يقول قانون الصحافة فى مصر. إليكم مادة من القانون السارى :
– مادة (4) من قانون الصحافة الحالى:
“يحظر على المؤسسة الصحفية والوسيلة الإعلامية والموقع الإلكترونى نشر أو بث أى مادة أو إعلان يتعارض محتواه مع أحكام الدستور، أو تدعو إلى مخالفة القانون، أو تخالف الالتزامات الواردة فى ميثاق الشرف المهنى، أو تخالف النظام العام والآداب العامة، أو تحض على التمييز أو العنف أو العنصرية أو الكراهية أو التعصب”.
وهنا السؤال أين التعارض بين الإعلان والمحددات التى يحددها القانون. أما حديث “الشفرات” التى ابتكرها الخيال فإن كتاب حلها ليس لدى أى صحيفة، ولكن تقوم عليه جهات أخرى أكثر احترافية ودراية.
وأخيرًا فإن هناك بعض الرضا عما حدث وهو رضا يرجع إلى أن الإعلان وما أثاره من خيال وتعليقات بصرف النظر عن أهميتها إنما تؤكد للمرة الألف أهمية وعظمة الأهرام واهتمام قرائها بل و منتقديها بكل ما ينشر بها حتى ولو كان إعلانًا، وهو اهتمام نعتز ونرحب به فى الأهرام طالما كان الهدف منه الصالح العام.»
